Zimbabva prezidento asertas, ke li ne dormas publike sed nur protektas siajn okulojn

Al tiuj, kiuj rimarkis, je la lastaj publikaj aperadoj de la 93-jaraĝa zimbabva prezidento Robert Mugabe, ties emon al dormeto, la registara proparolanto faris formalan malkonfirmon: li ne dormas, sed protektas siajn okulojn.

“La prezidento ne toleras lumecon. Atente observante oni rimarkus, ke li nur rigardas malsupren, por eviti direktan trafon de lumo”, tion ege serioze diris George Charamba al la registara gazeto The Herald. Krome: “Kiam mi legas, ke la prezidento dormas ĉe konferencoj, tiam mi pensas, ke temas pri eraro”.

Malgraŭ tio, ke Robert Mugabe estas la plej aĝa ŝtatestro de la mondo, li ne limigas siajn publikajn aperojn. En la lastaj monatoj li estis observita je “evidentaj dormetoj”, aparte en la pintkunveno de Afrika Unio, kaj pasintsemajne ĉe la Monda Ekonomia Forumo pri Afriko en la urbo Durbano (Sudafriko).

La bildoj ĝojigas kaj la gazetaron kaj la opozicion, kiuj disvastigas ajnajn fotojn pri tiaj “prezidentaj dormetoj”.

Tiu prezidento, kiu regas la lando ekde la jaro 1980-a, jam estis rajtigita de sia partio por kandidatiĝi en la balotado de 2018 por nova mandato.


Ĉi tiu teksto estas adaptaĵo fare de Paulo Cesar Pires el portugallingva artikolo.

Ĉifonulo malestimata ĉe motorciklo-vendejo aĉetis Harley-Davidson

Lung Decha

Ne taksi libron per ĝia kovrilo estas sufiĉe konata proverbo, sed ĝia malobservo  ankoraŭ oftas ie je homa ĉiutago. Jen nova tia okazintaĵo kies sciigo disvastiĝis pere de sociaj retejoj.

En Tajlando sinjoro surhavante aĉan t-ĉemizon, malpuran pantalonon kaj fingropantoflon eniris la motorciklo-vendejon “Maxsingburi Bike Shop”, en la provinco “Sing Buri”. Li estis promenanta tra la salono kaj tuj freneziĝis antaŭ nova modelo de la motorcikla marko Harley-Davidson. La komizoj lin rimarkis, sed sen alparolon, supozante neeblecon de negoco kun tia ulo.

Surprizigante la skipon de vendistoj, la propra estro de la vendejo decidis alparoli tiun figuron, kaj post demandaro pri potenco kaj ceteraĵoj tiu neprobabla konsumanto aprobis la prezon de 600 mil bahtoj (ĉirkaŭ 16 mil eŭroj) por alporti la motorciklon hejmen. Li efektivigis la aĉeton kontraŭ kontanta pago.

Klientoj de la vendejo, kiuj atestis la aferon, afiŝis kelkajn koncernajn fotojn en la reto, kaj eĉ la propra firmao same faris. Laŭ la novaĵretejo “Sanook” tiu rolulo estas la ĵusa emerita mekanikisto nomata Lung Decha, kiu uzis siajn monŝparaĵojn por akiri la maŝinon, kiu estis delonge dezirata de li.


Ĉi tiu teksto estas adaptaĵo fare de Paulo Cesar Pires el portugallingva artikolo.

Knabino liberiĝis de aligatora buŝo danke al indiko donita de temparko

aligatoro

2,5-metra aligatoro mordis 10-jaraĝan knabinon en lago de Florido (Usono), sed ŝi defendis sin per artifiko, kiu ŝi lernis en temparko kaj pro tio ŝi vundiĝis nur milde ĉe genuo kaj suro, laŭ informis ĉi-lunde diversaj lokaj amaskomunikiloj.

La knabino, kies identigo ne estis informita, estis lasanta siajn krurojn ĉe malprofunda parto de la lago de Parko Moss, apud la urbo Orlando, kiam la aligatoro atakis ŝin lastsabate, la 6-a de majo.

Laŭ la televidkanalo “WFTV” de Orlando, la knabino raportis, ke tuŝis la naztruojn de la aligatoro, ĉar tion ŝi lernis je ekskurso en la Parko Gatorland, kiu estas faka pri tia besto, kaj bonŝance ĝi malfermis sian buŝon.

Post ricevi 10 nodojn per kirurgia kudrado en hospitalo de Orlando la knabino resaniĝas hejme, kaj la aligatoro estis kaptita kaj mortigita. Fakte tiu okazintaĵo estis ja ia mirakla savo spertita de tiu infano.

En la usona subŝtado Florido vivas 1,3 milionoj da aligatoroj.


Ĉi tiu teksto estas adaptaĵo fare de Paulo Cesar Pires el portugallingva artikolo.

Pro militparado, nuboj estas forigotaj el la moskva ĉielo

antonov-26

Aviadiloj de la rusa aerarmeo intervenos morgaŭe (la 9-a de majo) por dissolvado de nuboj sur la ĉielo de Moskvo, okaze de “tago de la venko” kontraŭ nazismo (Granda Patria Milito), kiu en Rusujo estas festata je la 9-a de majo.

La rusa ministerio pri defendo informis ĉi-lunde, ke naŭ aviadiloj Antonov-12 kaj Antonov-26 el la transport-milita aviado havos la respondecon “ataki” la nubojn cele al plibonigo de la klimato, kiu hodiaŭ estas pluva kaj neĝa.

“Ekde la nula horo de la 9-a de majo la flugoj okazos dum la tuta tago”, tion informis la ministerio. Fakaj skipoj je tia afero injektos kemiaĵojn en la nuboj, de 3 mil ĝis 8 mil metroj altaj. Tia teknologio estiĝis en la tempo de la tiama Sovetunio.

Pli ol 10 mil soldatoj, 100 unuoj de blenditaj veturiloj kaj milita maŝinaro defilos laŭlonge de Ruĝa Placo, kadre de la tradicia defilado de la venko.


Ĉi tiu teksto estas adaptaĵo fare de Paulo Cesar Pires el portugallingva artikolo.

85-jaraĝa montogrimpanto estas la dua mortinto ĉe Everesto lastsemajne

Min Bahadur Sherchan

En la jaro 2008-a la nepalano Min Bahadur Sherchan estis la posedanto de rekordo pri la plejaĝulo kiu suprengrimpis sur la monton Evereston, kaj lastsabate (la 6-a de majo) provante repreni tian rekordon, li mortis ĉe la bazo-tendumejo, laŭ informo fare de piedirada gvidisto. Antaŭe, aliulo ankaŭ mortis en tiu sama semajno je grimpado de la plej alta monto de la mondo.

Nuntempe la rekordo apartenas al la 80-jaraĝa japano Yuichiro Miura, ekde la jaro 2013-a.

“Ŝajne Sherchan mortis pro koratako”, tion diris Ang Tshering Sherpa, kiu estas ĉefo de la alpisma asocio de Nepalo.

Ankaŭ la fama svisa montogrimpisto Ueli Steck mortis en la regiono de Everesto komence de tiu semajno, pro falo.

Nepalo permesis grimpadon ĉe Everesto al 371 montogrimpantoj en tiu sezono, kiu finiĝas ĉi-monate.

Ĉomolungmo (laŭ la tibeta nomo), Sagarmato (laŭ la nepala nomo) aŭ Everesto (laŭ la internacie plej uzata nomo) estas la plej alta monto en la mondo, situanta en la montaro Himalajo sur la limo inter Nepalo kaj Tibeto en la areo nomata Mahalangur Himal. Ĝia alteco estas 8.848 aŭ 8.850 metroj super marnivelo.


Ĉi tiu teksto estas adaptaĵo fare de Paulo Cesar Pires el portugallingva artikolo.

Karcerpuno pro kontrakti tre maldikan manekenon ekvalidas

Ĉi-vendrede en Francujo, la 5-a de majo, estis publikigitaj du dekretojn, kiuj koncernas al ekzerco de la profesio pri “manekeno”.

Ekde nun por perlabori en Francujo kiel manekeno tiaj profesiuloj nepre prezentu medicinan atestilon, kiu validas dujare kaj permesas “kontrolon pri iliaj ĝeneralaj sanstatoj”, taksitaj precipe per ties korpomasa indico (KMI). La franca ministerio pri sano tiurilate adoptis el la referencoj de Monda Organizaĵo pri Sano (MOS), la klasifikon “subpezo” (KMI sub 18,5). BMI estas mezurnombro por taksi la homan korpopezon en kilogramoj rilate al la kvadrato de la alto en metroj.

Tiu leĝo inkludas ĝis 6-monatan karcerpunon kaj monpunon je 75 mil eŭroj al tiuj kiuj kontrakti tre maldikan manekenon.

La alia dekreto devigas, ekde la venonta 1-a de oktobro, ke propagandaj bildoj kiuj estis komputile modifitaj ĉu por dikigi, ĉu por maldikigi, nepre estu akompanataj de la mencio “modifita foto”, tie kie ili aperos.

Per tiu nova regularo Francujo kuniĝas al aliaj landoj kun similaj leĝoj kiel Italujo kaj Hispanujo.


Ĉi tiu teksto estas adaptaĵo fare de Paulo Cesar Pires el portugallingva artikolo.

Parizo disdonos larvojn de kokcinelo al loĝantaro

kokcinelo

La pariza urbodomo disdonos 40 mil larvojn de kokcinelo al sia loĝantaro por anstataŭi uzadon de pesticidoj. La urbo spertas problelojn pri plagoj ĉe plantoj kaj floroj, kaj la aŭtoritatoj celas ekologian solvon – la kokcineloj rolas kiel ĉefaj predantoj de tiaj plantodamaĝantoj.

Laŭ retejo de la publika radio RFI, la direktorino de la departamento pri verdaj ejoj de la urbo, Pénélope Komitès,  asertis, ke Parizo delonge ne uzas pesticidojn en parkoj kaj ĝardenoj publikaj kaj oni intencas daŭre protekti la biodiversecon.

En la monatoj majo kaj junio oni liveras la larvojn en la Domo de Ĝardenado, ĉe la parko de Bercy, lokita en la 12-a arondismento de Parizo, Kvartalo de Bercy.

Je tiu unua fojo de tia agado instrupakaĵojn estos liveritaj kune kun la larvoj, kaj la pariza registaro okazigos metiejon por interesataj civitanoj kiuj volos lertiĝi pri la insektoj.

Tiu iniciato kostos 10.600 eŭrojn, kaj ĝi denove estos efektivigita venontjare, se sukcesa.


Ĉi tiu teksto estas adaptaĵo fare de Paulo Cesar Pires el portugallingva artikolo.

Projekto esploras la genojn de la gefratoj Kahn, kiuj vivis 110, 109, 103 kaj 101 jarojn

kahn

“La gefratoj Kahn pruvis, ke kiel specio oni kapablas sane vivi dum 110 jaroj. Tiuj kvar homoj spertis bonan sanstaton ĝis la fino de siaj vivoj. Kaj oni vidas ĉe ili genetikan faktoron tiurilate”, tion asertas Nir Barzilai, kiu estas direktoro de Ia instituto pri esplorado de maljuniĝo de la Medicina Lernejo Albert Einstein, en Novjorko (Usono).

“Ĉu neniu rekomendis al vi ĉesigi tabakfumadon?”, tion demandis la kuracisto Barzilai  al Helena Kahn, kiu respondis: “Jes, kompreneble, sed la kvar kuracistoj, kiuj tion sugestis al mi, ĉiuj jam estas mortintaj”. Ŝi fumadis dum 95 jaroj, sane vivis, kaj mortis kelkaj semajnoj antaŭ ŝia 110-jariĝo.

Ŝia frato Irving Kahn estis legenda figuro ĉe “Wall Street”, li eklaboris ĉe Novjorka Borso iom antaŭ ties “crash” (disrompo) okazinta en la 1929-a jaro. Kaj li daŭre laboranta kiel financa analizisto ĝis iom antaŭe sia morto en 2015, tiam 109-jaraĝa. Antaŭe jam estis forpasintaj ŝiaj 103-jaraĝa frato Peter kaj 101-jaraĝa fratino Lee.

Barzilai gvidas la projekton “La Genoj de Vivodaŭro”, kiu estas ambicia studo pri esplorado de genetika materialo de 670 centjaruloj. Ĉiuj estas judoj el la subetno aŝkenazoj, konsistanta je historie homogena loĝantaro, kiu estas perfekta laboratorio por genetika esplorado. La koncerna laboro komencis en la jaro 1988-a. La plimulto el ili jam mortis, kiel la gefratoj Kahn, sed ties DNA-oj daŭre revelacias.


Ĉi tiu teksto estas adaptaĵo fare de Paulo Cesar Pires el portugallingva artikolo.

Kuracistoj lertiĝos pri tekvondo cele al memdefendo je pacientatakoj

tekvondo

La kuracistoj de Institulo pri Medicinaj Sciencoj de la Tuta Barato (angla mallongigo AIIMS), kiu estas unu el la plej gravaj registaraj hospitalaj de la lando, estos trejnitaj pri memdefendo per tekvondo, ĉar kontraŭ ili plialtiĝis la perforto fare de pacientoj, laŭ informis ĉi merkrede hospitalaj fontoj.

Laŭ Vijay Gurjar, kiu estas prezidanto de la asocio pri doktoriĝantaj kuracistoj de AIIMS, tiu kreskigo de la perforto flanke de baratanaj pacientoj estas kaŭzata de tia nesufiĉa hospitala infrastrukturo, kaj pro tio, oni rimarkas oftecon pri manko de litoj kaj pritraktado al malsanuloj.

La asocio kontraktis du tekvondajn instruistojn, kiuj ekde la 15-a de majo instruos tiun lukton per 2-hora leciono ĉiŭtage, al tiuj kuracistoj kiuj volos lerni ĝin. Gurjar kalkulas, ke ĉirkaŭ 2 mil homoj ĉeestos la lecionojn, inklude kuracistoj, studentoj kaj funkciuloj de la hospitalo en Nov-Delhio.

Gurjar klarigis, ke la asocio planas proponi al Ministerio pri Sano, inkludon de lecionoj pri memdefendo kadre de la medicinaj kursoj.

Antaŭ monato kaj duono la kuracistoj de AIIMS protestis surhavante motorciklajn kaskojn dum siaj deĵoroj en la hospitalo, por esprimi solidaron al grupo da kvin kolegoj trafitaj de perforto tie nelonge.

En 2015 pli ol 75% de la baratanaj kuracistoj raportis esti trafitaj almenaŭ unufoje de ia perforto, laŭ Barata Medicina Asocio.


Ĉi tiu teksto estas adaptaĵo fare de Paulo Cesar Pires el portugallingva artikolo.

Polico estis alvokita pro kato sur arbo supoze armita per fusilo

En la urbo Newport, subŝtato Oregono (Usono), preterpasante arbon iu civitano ekvidis katon trankvile ripozanta sur iu el iliaj supraj branĉoj, sed supozeble la besto estis tenanta “fusilon”. Prizorge li decidis tion denunci al polico, cele preventi problemojn.

Tamen la policistoj trankviliĝis tuj post ricevo de bildo pri tiu “armita kato”. Rigardante la foton ja eblas konkludi, ke temas pri simpla optika iluzio, kiu konfuzigis la denuncanton.

Ŝerce la polico afiŝis sur sia fejsbukpaĝo la jenon: “La ‘armila kunporto’ de kato, kiu estis raportita al ni ĉi-matene estis senfundamenta. La kato, kiu estis kontaktitaj de niaj hundoj, estis alportanta nur neletalan arbobranĉon. Ili voĉe admonis la katon pri ĝia aĉa kamuflado kaj pozo kun io kio povus aspekti kiel atak-fusilon”.

Jen la afiŝo: ligilo


Ĉi tiu teksto estas adaptaĵo fare de Paulo Cesar Pires el portugallingva artikolo.