Rekordo de vizitoj en muzeo rilatas al tiu amasego da grasaĵo obstrukciinta la londonan kloakon

Ekde la 2-a monato 2018 peco da solida grasaĵo estas ekspoziciata en Londono (Unuiĝinta Reĝlando) ĉe faka muzeo pri la historio de tiu urbo. Laŭplane ĝia ekspoziciado finiĝus ĉi-semajne, sed la kuratoro Vyki Sparkes diris, ke ŝi surpriziĝis pro tiom da intereso, ke tiu objekto kaŭzis al la plubliko kaj pro plialtigo de la nombro de vizitantoj.

La grandega peco da grasaĵo – oni eknomis ĝin kiel “monstra glacimonto” – estis obstrukciinta la kloaksistemon de la londona kvartalo Whitechape (tiu de la supozaj atakoj de “Ĵakvo la Buĉisto” en la 19-a jarcento).

Kiam tiu blokego estis trovita pasintjare, tiam ĝi estis 130 tunoj peza kaj 250 metroj longa, kaj ĝia peco estas ekspoziciata alude al ekzemploj de la defioj spertantaj de la urbo kadre de mastrumado pri ruboproduktado.


Ĉi tiu teksto estas adaptaĵo fare de Paulo Cesar Pires el portugallingva artikolo.

Robotoj liveras manĝaĵojn en Silicia Valo

La universitata tereno de Kalifornio-Universitato gajnis novajn veturantojn, nome “KiwiBots “, kiuj estas radaj robotoj kun grando simila al tiu de bierskatolo, ili ne bezonas stiristojn kaj okupiĝas tutage liverante manĝaĵojn el restoracio de la ĉirkaŭaĵo.

Uzantoj de tiu sistemo per komputprogrameto mendas la manĝon kaj duonhore post ili ricevas ĝin alportata de tiaj veturiletoj, kiuj memstare veturadas uzante aron da filmiloj, kaj komputprogramojn kun altkvalitaj mapoj.

Entute 50 tiaj robotoj deĵoras en tiu regiono, kaj post la liverado ili revenas al oficejo de la ekfirmao “Kiwi Campus”, situanta je malpli ol kilometro de la universitato. Tiu sistemo malaltigis la prezon de livero al po USD 3,80 – ordinare ĝi varias de USD 8 ĝis USD 15 – kaj la celo estas eĉ pli malalta prezo – USD 1 kaj eĉ senpage por apartaj okazoj.


Ĉi tiu teksto estas adaptaĵo fare de Paulo Cesar Pires el portugallingva artikolo.

Mallonga ligilo por tiu ĉi afiŝo: wp.me/p87b5r-3Fd

Kiel kuiri bongustan milanan rizaĵon

La itala rizaĵo (en la itala lingvo “risotto”) estas tradicia plado de la itala kuirarto surbaze de la rizo. Ĝi estas unu el la plej oftaj manieroj kuiri la rizon en Itallando.

Oni plej agnoskas, ke la origina “milana rizaĵo” estis kreita en 1574 de la juna komencanta pentristo “Valério de Flanders”, kiu estis helpanto je konstruado de la vitromozaikaj fenestroj de Milano-Katedralo.

Ingrediencoj

8 teotasoj da bolanta buljono de kokino
1 teotaso da seka blanka vino
1 malgranda cepo pecetigita
1/2 teotaso da butero
1 1/2 teotasoj da arboria rizo
1 koverto da sekigitaj stigmoj de safrano
4 supkuleroj da raspita parma fromaĝo

Preparado

1) En kuirpoto fritu per mezforta fajro dum du minutoj la cepon kun duono da butero, miksante senĉese.

2) Aldonu la rizon, fritante kaj miksante ĝin dum minuto. Verŝu la vinon kuirante ĝin ĝis ĝia forvaporiĝo.

3) En taso miksu la safranon kun la bolanta buljono kaj aldonu ilin al la rizo en la poto.

4) Metu la restantan buljonon iom post iom, laŭ la rizosekiĝo, miksante.

5) Forigu la fajron kaj metu la restojn de butero kaj fromaĝo. Miksu, kovru la poton kaj lasu ripozi dum du minutoj.

6) Transigu ĝin al bovlo por tuja livero al manĝotablo.


Ĉi tiu teksto estas adaptaĵo fare de Paulo Cesar Pires el portugallingva artikolo.

Mallonga ligilo por tiu ĉi afiŝo: wp.me/p87b5r-3CO

Ĉasistoj mortigis 122 gravedajn balenojn

Japanaj balenistoj kaptis kaj mortigis 122 gravedajn balenojn de la speco “balenoptero nana” lastsomere en Antarkto. Laŭ raporto sendita al Tutmonda Balena Komisiitaro (angle “International Whaling Commission – IWC”), la balenŝipoj mortigis entute 333 tiajn bestojn inter la 11-a monato 2017 kaj la 3-a monato 2018 – tiam la ĉasista grupo estis vizitanta Sudan Poluson.

Asertas Japanlando, ke sia projekto pri kaptado de balenoj koncernas “sciencajn celojn”, malgraŭ ĝia viando esti vendata por nutrado. En 2014 Unuiĝintaj Nacioj riproĉis tiun aferon – laŭ UN tio estas “mortiga esplorado”.

Krom tiaj 122 gravedaj bestoj, estis mortigitaj ankaŭ balenidoj – 61 viraj kaj 53 inaj.


Ĉi tiu teksto estas adaptaĵo fare de Paulo Cesar Pires el portugallingva artikolo.

Mallonga ligilo por tiu ĉi afiŝo: wp.me/p87b5r-3wT

128-jaraĝa virino asertas, ke spertis neniam feliĉan tagon la tutan vivon

“Mi neniam spertis eĉ ununuran feliĉan tagon dum la vivo”. Tiun plendon faras la viriro Koku Istambulova, kiu estas 128-jaraĝa kaj loĝas en vilaĝo de Ĉeĉenlando.

“La tutan vivon mi ĉiam multe laboris fosante ĝardenojn. Mi lacas”, ŝi diris intervjue al lokaj gazetoj, krom aserti, ke ŝia vivdaŭro ne estas dia donaco, “sed puno”. Ŝiaj filoj jam estas mortintoj – Tamara, la lasta filino antaŭ kvin jaroj, 104-jaraĝa.

Pri sia vivdaŭro ŝi ne konas la kialon – “estis la dia volo” – sed diris ke ĉiam ŝategis fermentintan lakton, kaj manĝas nek viandaĵon nek supojn.

Naskiĝinta la 1-an de la 6-a monato 1889 – tion konfirmas la rusa registaro post analizo de dokumento – Istambulova povos trafi la rekordon pri la plej longe vivanta homo en tuta historio.

La plej aĝa VIRO estis tiu japano mortinta en 2013, nome Jiroemon Kimura, kiu travivis 116 jarojn kaj 54 tagojn. Pri la plej aĝa HOMO, koncernas la francinon Jeanne Louise Calment, mortinta en 1997, je la aĝo 122 jaroj kaj 164 tagoj.


Ĉi tiu teksto estas adaptaĵo fare de Paulo Cesar Pires el portugallingva artikolo.

Mallonga ligilo por tiu ĉi afiŝo: wp.me/p87b5r-3sS

Cristiano Ronaldo starigos restoracion en Brazilo

Laŭ la portugala gazetaro la mondfama piedpilkisto Cristiano Ronaldo pretigas en Brazilo restoracion, kiu ricevos la nomon de sia patrino – Sinjorino Dolores – kaj ĝi jam estas konstruata en la urbo Gramado – troviĝanta en la montara regiono nomata “Serra Gaúcha”, de la subŝtato Suda Rio-Grando, sude de la lando.

Faka pri la portugala kuirarto, tiu nova restoracio funkcios kunlabore kun du firmaoj de tiu regiono, kaj laŭ la gazeto “Jornal do Comércio” de tiu subŝtato, la menuo enhavos tiajn originalajn receptojn de Sinjorino Dolores.

“Dona Dolores Aveiro” (Sinjorino Dolores Aveiro) verkis kuirartan receptaron, kune kun Katia Aveiro, kiu estas fratino de Cristiano Ronaldo. Enlistiĝas en tiu publikaĵo la recepto de lia preferata plado, nome “Bacalhaŭ à Brás” (Gadaĵo laŭ Brás-maniero).

La malfermo de la restoracio estas planata por okazi venontjunie, profitante la etoson de la piedpilkada eventego “FIFA-Monpokalo 2018”.


Ĉi tiu teksto estas adaptaĵo fare de Paulo Cesar Pires el portugallingva artikolo.

Piedpilkisto de “Boca Juniors” estis trafita de antaŭjuĝo, ĉar li estas senbestaĵisto

En la renkonto pri piedpilkado kontraŭ la brazila teamo “Palmeiras”, okazinta la 25-an de la 4-a monato, la piedpilkisto Sebastián Pérez unuafoje partoprenis ekde la komenco la ludon. Li naskiĝis en Kolombio, ludas kiel centrulo, kaj estas resaniĝinta pri genua vundo, kiu postulis preskaŭ jaron da kuracado. Tiurilate eĉ antaŭjuĝo kontraŭ li estis, ĉar li estas senbestaĵisto.

Laŭ la retejo “Patadas y Gambetas”, la lerteco kaj nutrado de tiu kolombia piedpilkiisto estis multe pritraktataj ĉe sportaj televidprogramoj en Argentino, konata kiel “lando de la rostita viando”. Multaj ŝatantoj kaj eĉ kelkaj gazetistoj asertis, ke li longe ne revenis al ludado ĉar li estas senbestaĵisto.

Lastlunde, la 23-an, per gazetara intervjuo Sebastián Pérez diris: “En Argentino oni tabuas tian nutradon. Altkvalitaj senbestaĵistaj atletoj ekzistas. Mi neniam estis korpegulo, kaj mi estis atendanta tian reagon koncerne al mia nutrado, ĉar ĝi maloftas ĉe piedpilkado. (…) Se iu ĉiomanĝulo vundiĝas kaj ne povas ludi, oni diras nenion. Male okazas al mi, oni diras, ke mi ne povas ludi ĉar mi estas senbestaĵisto. Mi jam estas anime preta tiurilate. Mi staras ĉe bona nivelo kaj preta por preni tiun oportunon ĉe ‘Boca’. Nur tion gravas al mi”.


Ĉi tiu teksto estas adaptaĵo fare de Paulo Cesar Pires el portugallingva artikolo.

Grandega kanada nutraĵfirmao vetas je insektoj

En Kanado la plej granda firmao de la nutraĵa industrio, nome “Maple Leaf Foods”, estas investanta en la firmao “Entomo Farms”, kiu konsideras rostitajn grilojn kaj aliajn insektojn kiel pli daŭripova elekteblo ol viando, koncerne al proteina nutrado.

Maple Leaf estas ofertanta financadon (tipo serio-A) al Entomo, kiu estas la plej granda produktanta de insektoj por homa nutrado, kun sidejo en la urbo Ontario, Kanado, kaj per komunikaĵo lastmerkrede ĝi asertis, ke per tiu monrimedo ĝi plialtigos la faradon – surbaze de griloj kaj larvoj – de ingrediencoj kiuj komponiĝas farunoj por produktado de briketproteinoj, vitaminoj kaj saŭcoj.

“Nia investo per malplimulta kapitalo en la firmao Entomo kongruas al nia celo iĝi tutmonde la plej daŭripova firmao pri proteinnutrado”, tion diris per komunikaĵo Michael McCain, la prezidanto de Maple Leaf.


Ĉi tiu teksto estas adaptaĵo fare de Paulo Cesar Pires el portugallingva artikolo.

Jen brazila bakaĵo aspektanta kiel “kapo de Neymar”

En Brazilo “coxinha” (prononce “koŝinja”) estas ŝatata fritita manĝaĵo farita el pastaĵo de tritika faruno kun farĉo de disfadenigita kokaĵo, kaj pasintsemajne en la urbo Governador-Valadaro, subŝtato Minas-Ĵerajso, aparta “coxinha” estis kreita de la 27-jaraĝa junulino Shirley Candido.

Per la devizo “trokuraĝo, ĝojo kaj kremfromaĝo” ŝi – kiu estas kaj reklamisto kaj kuiristo – propagandis sur socia retejo sian novan kreaĵon: bakaĵo aspektanta kiel la kapo de la fama brazila piedpilkisto “Neymar”.

Intervjue al la retejo “UOL esporte” Shirley klarigis ke ŝi ne surmerkatigos tiun bakaĵon: “En tiu tago farunpastaĵo restis, mia ideo tiurilate estis antaŭe aperinta, iom da libera tempo mi spertis kaj finfine mi efektivigis ĝin. Mi ŝatas Neymar, kaj ankaŭ ŝercon. Kaj oni entuziamiĝas je jaro kun okazonta mondpokalo de piedpilkado, ĉu ne?”

coxinha


Ĉi tiu teksto estas adaptaĵo fare de Paulo Cesar Pires el portugallingva artikolo.

La provo pri kuirista roboto por hamburgaĵoj

“Flippy” estas kuirista roboto kreita de la firmao “Miso Robotics”, kaj ĝi kapablas prizorgi samtempan kuiradon je 12 hamburgaĵoj. Ĝi ekfunciis ĉi-monate lunde (la 5-an) en lunĉejo de la reto “CaliBurger” en la urbo Pasadena (Kalifornio – Usono), sed post tri tagoj ĝi estis malŝaltita por reagordigo de la provo, kiu interesegis la klientojn kaŭzante plialtigon de la mendado.

Al la usona gazeto “USA Today” la firmao “Miso Robotics” asertis lastĵaŭde, ke “Flippy” estus refunkciigita lunde (la 12-an) kun limigita deĵoro – de la horo 11-a ĝis la horo 2-a posttagmeze – por helpi je tagmanĝa tempo.

En tiu lunĉejo en la areo nomata “Flippy’s Kitchen” oni povas rigardi la agadon de tiu roboto. La firmao “CaliBurger” planas instali ĉi-jare tiun roboton ĉe pliaj 50 lunĉejoj de sia reto, komenciĝante per tiuj en la urboj Seatlo (Vaŝingtonio) kaj Anapoliso (Marilando).

Jen koncerna filmeto: LIGILO


Ĉi tiu teksto estas adaptaĵo fare de Paulo Cesar Pires el portugallingva artikolo.