Firmao garantias, ke ĝia robota polvosuĉilo ne estas spiono

Ĉi-semajne estis diskonigita, ke la usona firmao “iRobot” povus uzi la robotan polvosuĉilon “Roomba” por kolekti informojn pri la domoj de ĝia klientaro kaj poste vendi tiujn datumojn al aliaj firmaoj. Tamen ŝajne tiu supozo devenas el miskompreno.

La tuta problemo ekestis per frazon intervjue dirita de Colin Angle, kiu estas prezidanto de la firmao “iRobot”. Li asertis, ke ekzistas “ampleksa sistemo pri aĵoj kaj servoj, kiu inteligenta domo povos montri, se oni havus riĉenhavan mapon de ties interno, kies kunhavigo dependus de permeso de la uzanto”.

Roomba kaj similaj aparatoj posedas kameraojn kaj sentilojn, kiuj permesas al ili plenumi aŭtomatan purigadon de la domo.

Laŭ la firmao, informoj kiel tempodaŭro de purigado, trairita distanco kaj mesaĝoj pri eraroj povas esti senditaj al la “nubo” kaj esti prezentitaj per poŝtelefonoj, se la polvosuĉilo Roomba estas konektita per vifio (sendrata reto).

“Tia estis malĝusta interpreto. Colin neniam disris, ke iRobot provus vendi datumojn aŭ mapojn de internodomo de la konsumantoj al aliaj firmaoj. Ni neniam pritraktis interŝanĝon de datumoj kun aliaj firmaoj, kaj neniam vendus informojn pri niaj klientoj”, tion asertis iRobot al la retejo ZDNet.


Ĉi tiu teksto estas adaptaĵo fare de Paulo Cesar Pires el portugallingva artikolo.

Merkatika ago disdonas tekilon per trinkfontanoj

Amuzo je agoj kadre de merkatiko oftiĝas. Ĉi semajne nova okazintaĵo reliefiĝis, fare de la marko de tekila “Jose Cuervo” por atentigi la konsumantojn.

La merkatika ago de la fabrikanto de alkoholaĵoj “Jose Cuervo” estis kreita partnere kun la propagandagentejo “CP+B”, kaj elfarita lunde la 24-an de julio en la urbo Los-Anĝeleso (Usono), por celebri la festotagon “National Tequila Day” (Nacia Tago de Tekilo).

Ofertante senpage la brandon en trinkfontanoj (ili estis nomitaj “H2Cuervo”), la marko invitis la homojn al profito de momentoj da malstreĉo.

Por certigi, ke nur plenkreskuloj partoprenus la aferon, tiam deĵoris kontrolantoj pri la aĝo de la enviciĝitaj homoj.


Ĉi tiu teksto estas adaptaĵo fare de Paulo Cesar Pires el portugallingva artikolo.

La unua aerŝipo per ŝipanoj produktita en Sud-Ameriko

Okazis ĉi-lunde matene, la 24-an de julio, la inaŭgura flugo de la unua produktita en Sud-Ameriko aerŝipo per ŝipanoj. La deteriĝo efektiviĝis en la urbo São Carlos (subŝtato São Paulo – Brazilo) je la horo oka kaj duono, kaj estis vive elsendita pere de fejsbukpaĝo de la fabrikanto, nome la firmao “Airship do Brasil”.

Laŭ informoj de la fabrikanto, la aerveturilo ADV3-X01 estas 49 metroj longa, 17 metroj alta kaj povas transporti 1,2 tunojn da ŝarĝo. Krom piloto, ĝi havas lokon por kvin homoj. La motoro da 300-ĈP ebligas rapidecon da 85 kilometroj/hore.

Aerŝipoj ne postulas aviodromon por alteriĝo aŭ ekflugo. Jen kelkaj uzeblecoj por tiuj flugmaŝinoj: pilota trejnado, transporto de pasaĝeroj, flugo por aerfotometria rekono, agrikulturo, serĉo kaj savo, etaj ŝarĝoj, malfacile alirebla loko, kontrolo de reto de elektraj kabloj, merkatiko, propagando, ktp.

La komercado de tiu veturilo komencos en 2018, kaj la firmao prilaboras ankaŭ la modelon ADB-3-30, kiu kapablos de transporti 30 tunojn da ŝargo.


Ĉi tiu teksto estas adaptaĵo fare de Paulo Cesar Pires el portugallingva artikolo.

Aperis aparato, kiu lige kun telefona aplikaĵo atentigas pri korpa malbonodoro

En Japanujo estis lanĉita ĉi-ĵaŭde (la 13-a de julio) iu aparato kiu promesas helpi tiujn, kiuj maltrankviliĝas je siaj korpaj odoroj.

Nomata “Kunkun Body”, ĝi estas detektilo pri odoroj, kiu konektiĝas per Bludento, kaj atentigas la uzanton pri io neakceptebla, laŭ la brita taggazeto “The Guardian”.

Tiu sistemo estis disvolvita de la firmao pri fotiloj kaj presiloj “Konica Minolta”, kaj ĝi fokusigas la regionojn de akseloj, kapo, piedoj kaj malantaŭo de aŭrikloj.

La aparato celas al detektado de odoroj pri ŝvito kaj graso, kaj ĝi havas grandon simile al tiu de eta sonregistrilo. Kunkun Body estas vendata kontraŭ 30.000 japanaj enoj (ĉirkaŭ 230 eŭroj).


Ĉi tiu teksto estas adaptaĵo fare de Paulo Cesar Pires el portugallingva artikolo.

Firmaoj profitiĝas el antaŭeniro de la merkato de insektoj por nutrado

“Apetito” por insektoj nune trafas entreprenantojn, kiuj emas novigi la nutraĵan industrion, pro ekkono de la avantaĝoj – al sano kaj medio – de nutrado per griloj, muŝoj kaj vermoj.

Ĉe antaŭvido de kresko de la homa loĝantaro al 10 miliardoj da homoj ĝis la 2050-a jaro, kaj same la kresko pri bezono de nutrajoj, pli kaj pli firmaoj ekesploras la potencialon de insektoj kiel fonto de manĝaĵo kaj besta nutraĵo.

Insektoj efikas ĉar, kompare kun aliaj bestoj por nutrado, ili rolas per malpli granda media damaĝo, krom enhavi grandan kvanton da proteinoj, vitaminoj kaj mineraloj.

“La pioniroj pri tiu sektoro profitas la oportunon. Tute klare estiĝas tian merkaton pri manĝeblaj insektoj, kaj kiu ne timas riski, tiuj entreprenantoj estas agantaj por esplori ĝin”, tion asertis Patrick Durst, el ONA (Organizaĵo pri Nutrado kaj Agrikulturo de la Unuiĝintaj Nacioj).

Registaroj, filantropiaj organizoj kaj fakaj fondusoj pri agrikultura industrio estas subtenantaj tiaj ekfirmaoj.

Tiu merkato pri manĝeblaj insektoj, kiu inkluzivas lakto-kirlaĵon, proteinaj biskvitoj el polvo de grilo, kaj manĝaĵoj el larvoj de drozofiloj kaj tervermoj, estis taksitaj je ĉirkaŭ 100 milionoj da usonaj dolaroj, kaj ĝi plialtigos al USD 1,5 miliardoj ĝis la jaro 2021-a, laŭ Arcluster, kiu estas singapura firmao pri haŭsiero.


Ĉi tiu teksto estas adaptaĵo fare de Paulo Cesar Pires el portugallingva artikolo.

Sekseco pritraktendas, laŭ averto de fakuloj pri robotiko

 

Unuafoje aperas studo koncerne al supoza agado de seksaj robotoj ĉe homara ĉiutago en estonto. Malgraŭ ke ili utilus je iuj situacioj, maltrankvilo estas pri iuj aliaj.

Fare de Fondaĵo por Respondeca Robotiko (Londono – Unuiĝinta Reĝlando), tiu esploro estis publikigita ĉi-semajne, kaj ĝi informas, ke uzado de tia androido povus estigi seksan revolucion – ili helpus homojn kiel maljunuloj, fizikaj handikapuloj kaj tiuj trafitaj de psika traŭmato, ekzemple.

Inter la eblecoj tiurilate la scientistoj plej timas tia kia estus la uzado de infanaspektaj robotoj (nekredeble jam ekzistas japana firmao tia, starigita de memkonfesinta pedofilo, kiu raportas pri ilia utilo al si mem, je anstataŭo de veraj infanoj).

Tiurilate la esploro citas la raporton de Patrick Lin, kiu estas direktoro de grupo pri etiko en Universitato de Kalifornio (Usono) – “prizorgi pedofiloj per seksaj infanaspektaj robotoj estas propono duba kaj forpuŝa. Imagu solvi rasismon, permesante al rasisto, ke li frapus negran roboton. Ĉu tio efikus? Probable ne”.

Intervjue ĉe BBC, Kathleen Richardson, kiu estas profesorino pri robotika etiko en la Monfort-Universitato (Unuiĝinta Reĝlando), asertis ke “la vera problemo ne konsistas la pupoj, sed la seksa komercado. Tiaj seksaj robotoj estas nur plia speco de pornografio”. Krome, laŭ ŝi, tiaj androidoj nepre plialtigus la socian izolecon.


Ĉi tiu teksto estas adaptaĵo fare de Paulo Cesar Pires el portugallingva artikolo.

Francujo ĉesigos ĝis 2040 vendadon de aŭtoj, kiuj uzas benzinon aŭ dizeloleon

Dum prezento de la registara “klimata plano”, por atingo de la celoj de la pariza interkonsento pri klimatoŝanĝiĝo, la nova ministro pri ekologio Nicolas Hulot anoncis ĉi-jaŭde (la 6-a de julio), ke Francujo finigos la komercadon de aŭtoj, kiuj uzas benzinon aŭ dizeloleon.

Laŭ Hulot tiu proponita celo estas “peniga”, aparte al industrio, sed “la kondiĉoj” por tia faro “jam estas aperintaj”, temas pri “vera revolucio”, senprokraste farenda, ĉar la problemo koncernas ankaŭ publikan sanon.

Francujo produktas la 100% elektran aŭtomobilon plej vendata en Eŭropo, nome “Renault Zoe”, kiu iomete superas vendadon de tiuj “Mitsubishi Outlander PHEV” kaj “Nissan Leaf”.

En la anonco la ministro aludis ankaŭ al la sveda firmao Volvo, kiu ekde 2019 produktos nur elektrajn aŭ hibridajn modelojn.


Ĉi tiu teksto estas adaptaĵo fare de Paulo Cesar Pires el portugallingva artikolo.

Alĝeriaj virinoj starigas novan rekordon pri purigado de teleroj

argelia

Formante la plej grandan homgrupon kiu purigis telerojn, per sapitaj manoj 412 virinoj enmetis Alĝerion en Guinness-libro de rekordoj.

Antaŭ oficiala juĝistino de Guinness-libro de rekordoj, tiuj 412 virinoj samtempe lavis po 2 telerojn. Tiu faro okazis lastvendrede (la 16-a de junio) en la ĉefurbo Argel, kadre de filantropia supeo aranĝita de marko de produktoj por purigado de mangilaro.

Laŭ Guinness-libro de rekordoj, la antaŭa rekordo pri purigado de teleroj okazis je la 15-a de novambro 2016, kiam 300 homoj faris la samon en Filipinoj, kie ankaŭ la koncerna evento estis okazigita de marko pri produktoj por purigado.

Tiuj informoj fontas el la franca novaĵagentejo AFP.


Ĉi tiu teksto estas adaptaĵo fare de Paulo Cesar Pires el portugallingva artikolo.

Fiska aŭtoritato baras vendadon de fabriko

wow-nutrition

Ĉi ĵaude (la 1-a de junio) en Brazilo, Sekretariejo pri Financoj de Subŝtato São Paulo haltigis la komercadon de produktoj fabrikataj de la firmao “WOW Nutrition”, kadre de la operacio pri fiska kontrolado nomita “Doce Alerta” (Dolĉa Atentigo).

Tiu firmao produktas la sukojn “Sufresh” kaj “Soyos”, kaj la teojn “Feel Good”, kaj ĝi estas akuzita pri ne transdono al la subŝtata registaro de ĉirkaŭ 90 milionoj da realoj de ICMS, kiu estas aldonvalora imposto (AVI) aŭ vendimposto, kiun entrepreno devas pagi al la financa instanco surbaze de la aldonvaloro kiun li kreis, vendoj kaj kiu finfine pagigas la finan aĉetanton.

Tiamaniere, laŭ la aŭtoritatoj, “WOW Nutrition” estas operacianta per pli granda laborkapitalo, kiu helpas je konkerado de merkato ĉe konkurantoj.

La sidejo de la firmao en la urbo Caçapava (subŝtato São Paulo) ne estis sigelita, sed ĝis la pago postulata de la registaro, ĝi ne plu rajtas eldoni “fiskajn notojn”, kiuj en Brazilo estas dokumentoj pri vendo de produtoj. Tial, la firmao povas resti produktanta, sed ĝi ne rajtas komerci.

Ekde la jaro 2014-a la fisko pritraktas tiujn neregulaĵojn de “WOW Nutrition”. Krom la jam rimarkita manko de transdono de ICMS-imposto, la sekretariejo ankaŭ planas esplori pri ekzisto de impost-evito tie.


Ĉi tiu teksto estas adaptaĵo fare de Paulo Cesar Pires el portugallingva artikolo.

Bierdukto por muzikfestivalo estas konstruata de germanoj

bierdukto

7-kilometra duktosistemo situanta je 80 centimetroj subgrunde, transportos 400 mil litrojn da biero por konsumado ĉe “Wacken Open Air”, kiu estas la plej granda festivalo pri metalroko tutmonde, okazonta norde de Germanujo. En tiu 3-taga evento la homoj trinkadas mezume po 5,1 litrojn da biero.

Laŭ asertis la proparolanto Frederike Arns, al novaĵagentejo DPA, tiu duktosistemo evitos kaj la difektigon de la grundo pro veturado de tropezaj bierkamionoj, kaj la ĉiutagan disdonon de bierbareloj diversloke en la tuta eventejo.

Ĉi-jare “Wacken Open Air” okazos de la 3-a ĝis la 5-a tago de aŭgusto, kaj ĝia programo promesas 150 spektaklojn. Inter la artistoj kaj muzikgrupoj jam konfirmitaj estas Megadeth, Alice Cooper, Marilyn Manson, Trivium, Accept, Status Quo kaj Turbonegro.


Ĉi tiu teksto estas adaptaĵo fare de Paulo Cesar Pires el portugallingva artikolo.