Ĉevalo aŭkciita je BRL 7 milionoj mortis postmonate

cavalo

Mortis last-lunde vespere (la 19-a de junio), en la subŝtato Suda-Riogrando (Brazilo), la virĉevalo nomata “Equador de Santa Edwiges”, kiu nune staris inter la plej reliefigitaj reproduktantoj de la lando. Subite ĝi estis trafita de abdomena malkomfortaĵo, kies akriĝo mortigis ĝin, malgraŭ tio, ke ĝi estis zorgita de veterinara hospitalo ĉe la federala universitato de la urbo Pelotas-RS.

Tiu besto estis bredita de la faka bieno “Cabanha Santa Edwiges”, de la urbo São Lourenço do Sul-RS, kaj ĝi estis patro de diversaj idoj, kiuj estis premiitaj kadre de ĉeval-konkursoj.

Pasintmonate, je la 19-a de majo, grupo da 21 bredistoj kune aĉetis per aŭkcio tiun beston, kontraŭ entute 6,97 milionoj da realoj (tio estas pli ol du milionoj da usonaj dolaroj). Tiu ĉevalo, kiu estis el la brazila raso nomata “crioulo”, 11-jariĝus en la venonta oktobro.


Ĉi tiu teksto estas adaptaĵo fare de Paulo Cesar Pires el portugallingva artikolo.

Urso mortigis adoleskanton dum montokurado

urso-alasca

Je la lasta semajnfino junulo estis mortigita de urso dum kurkonkurenco okazinta en Alasko, laŭ informoj fare de la lokaj aŭtoritatoj hieraŭ, la 19-a de junio.

Dimanĉe (la 18-a de junio) Patrick Cooper, de la urbo Anchorage (Alasko – Usono), estis partoprenanta en jara montokurado, kiu trapasas sovaĝetan regionon, kaj tiam li ektrovis la urson.

Laŭ informis Nathan Michell, de la polica departamento de Anchorage, la junulo sukcesis sendi tekstomesaĝon al iu familiano sia, raportante ke la urso estis persekutanta lin.

Diversaj sukuristoj kaj partoprenantoj de la kurado mobiliziĝis por trovi Cooper, sed la ĉeesto de la urso malhelpis ilin, ĝis kiam la besto vundite forfuĝis, pro pafo fare de kampogardisto.

La korpo de Cooper estis trovita ĉe ia duonarbara zono, je 450 metroj malproksime de la vojo de la kurado.


Ĉi tiu teksto estas adaptaĵo fare de Paulo Cesar Pires el portugallingva artikolo.

Mortis toreisto vundita en taŭra batalludo

Iván Fandiño

La hispana toreisto Iván Fandiño mortis lastsabate (la 17-a de junio) en malsanulejo de la sudokcidenta franca urbo Mont-de-Marsan, kie li estis enhospitaligita post kornovundo kiu trafis lin dum toreado.

Fandiño, 36-jaraĝa, falis grunden post stumbli je sia tolo de toreado, kaj tiam lia pulmo estis trafita de la korno de la virbovo.

Tiu eŭska toreisto, kiu naskiĝis en la urbo Orduña (regiono de Bilbao – Hispanujo) estis partoprenanta en la toreadoj de la urbo Aire-sur-l’Adour (Francujo), kune kun la hispano Juan Del Álamo kaj la franco Thomas Dufau.


Ĉi tiu teksto estas adaptaĵo fare de Paulo Cesar Pires el portugallingva artikolo.

Fuĝante pro muso, virino rompis piedartikon, kaj rajtas monkompenson de 40 mil realoj, pagenda de Makdonaldo

muso

Lastvendrede, la 9-a de junio, verdikto fare de brazila supera juĝinstanco devigas la ĉenon de restoracioj Makdonaldo, pagi monkompenson da 40 mil realoj (preskaŭ 11 mil eŭroj) al virino, kiu fuĝante de muso, rompis sian piedartikon ĉe unu el la restoracioj de tiu reto pri rapidmanĝejo en la urbo Rio-de-Ĵanejro (Brazilo).

La virino, kiu procesas kontraŭ Makdonaldo, asertis ke en sia paŭzo por tagmanĝo ŝi venis al la restoracio, kaj ekvidante la muson ŝi genuiĝis sur iu seĝo por eviti la besteton, sed ankaŭ ĝi provis grimpi seĝen. Klopodante malsupreniri el la seĝo ŝi falis kaj frakasis la piedartikon.

Pro tiu akcidento la virino bezonis 75 tagojn da ripozado, kaj ŝi diras, ke dum tiu periodo ŝi ricevis registaran profiton pli malgranda ol ŝia salajro, krom suferi estetikan difekton pro la kirurgio.

La apelacio fare de Makdonaldo al tribunalo, kontraŭ la pagota sumo, estis rifuzita.


Ĉi tiu teksto estas adaptaĵo fare de Paulo Cesar Pires el portugallingva artikolo.

Ĉina urbo adoptas “unuhundan politikon”

ununura-hundo

Simile al la loĝantara kontrolo praktikita dum dekoj en Ĉinujo, nome “unuinfana politiko”, la urbo Cindao en la provinco Ŝandongo decidis implementi la “unuhundan politikon”.

Laŭ la decido de la urbodomo, ĉiu familio rajtas posedi po unu hundon. Krome, la propruloj estas devigataj konservi la la beston vakcinita, ekipita kun blato kaj registrita ĉe aparta oficejo publika.

La municipa registaro publikis ankaŭ liston enhavanta “40 malpermesatajn rasojn”, kiuj estas taksataj kiel “danĝeraj al socio”. Inter ili estas germana ŝafhundo, leporhundo, tibeta korthundo, pitbulo kaj dobermano.

Pro kreskado de la mezklaso, la nombro de dorlotbestoj ege pligrandiĝis en tiu lando. Laŭ la ĉina registaro tiu kreskado okazas je la ritmo de 10% jare.


Ĉi tiu teksto estas adaptaĵo fare de Paulo Cesar Pires el portugallingva artikolo.

Pro afableco, hundo estis eksigita de la polico

afabla-hundo

Deĵori kiel policista hundo ne estas facila afero. Interalie oni devas persekuti krimulojn kaj flari suspektajn objektojn, kaj ne ĉiuj hundoj pretas fari tion. La hundeto Gavel, ekzemple, estis eksigita de la polico de la urbo Brisbano (Kvinslando – Aŭstralio), ĉar ĝi estis tre karesema ĉe ĝia posteno.

Laŭ la brita gazeto Daily Mirror, la 1-jaraĝa hundo eniris la korporacion aprile pasintjare, sed dum la koncerna trejnado ĝi montriĝis tre kamaradema, ŝajnante pli interesita ruliĝi kaj havigi al si kareson ĉe la ventro, ol persekuti krimulojn. El aro da 40 hundoj, Gavel estis la ununura malaprobita.

Tamen, laŭ popoldiro, kiam pordo fermiĝas, tiam fenestro malfermiĝas. La samaj trajtoj de karaktero, kiuj malhelpis ĝin je polica servo, tiuj igas ĝin perfekta por okupi alian postenon – tiu de “vic-reĝa hundo”. La hundeto estis kontraktita de la loka registaro kaj nun deĵoras bonvenigante turistojn, kiuj vizitas la sidejon de la loka Plenuma Povo, kaj foje ankaŭ akompanante la guberniestro de Kvinslando, nome Paul de Jersey.


Ĉi tiu teksto estas adaptaĵo fare de Paulo Cesar Pires el portugallingva artikolo.

Ĉasisto estis mortpremita de elefanto

Theunis Botha

Paftrafita de ĉasisto, ina elefanto falis sur alian ĉasiston, premante lin ĝis morto, dum ĉasada ekspedicio en Gwai (Zimbabvo), lastvendrede, la 19-a de majo.

La mortinto estis konata ĉasisto, nome Theunis Botha, 51-jaraĝa, kiu gvidadis ĉasadojn pri leonoj kaj leopardoj, de lia firmao “Game Hounds Safaris”.

Laŭ informoj, grego de elefantoj montriĝis al la grupo de ĉasistoj, kiu ekpafis kontraŭ la bestoj. Alarmite, kelkaj elefantoj ekkuris direkte al ĉasistoj, kaj Botha estis trafita de unu el ili. Celante forpeli ĝin iu membro de la ĉasista grupo pafis la beston, sed ĝi falis sur la ĉasisto mortigante lin. Ankaŭ la elefanto mortis poste.

Proparolanto de “Zimbabwe Parks & Wildlife Authority” informis, ke la akcidento okazis en “Good Luck Farm”, proksime de “Hwange National Park”.

Botha estis amiko de la ĉasisto Scott Van Zyl, 44-jaraĝa, kiu pasintmonate estis mortigita de krokodiloj en Zimbabvo.


Ĉi tiu teksto estas adaptaĵo fare de Paulo Cesar Pires el portugallingva artikolo.

Laŭdoj kaj prifajfoj en la debuto de “Okja”

okja

La polemiko pri la filmo de la sudkorea reĝisoro  Bong Joon-ho, nome “Okja”, kiu estas la unua produktita de la firmao Netflix por la “Ora Palmo”, malhelpis ties lanĉon ĉi vendrede (la 19-a de majo), sed ne sufiĉe por eviti aplaŭdojn al tiu longdaŭra filmo pri amikeco inter knabino kaj monstro.

La Festivalo de Cannes estas prestiĝa internacia filmofestivalo okazanta ĉiujare dum la tria semajno de majo en la franca urbo Cannes en ejo nomita “Palais des Festivals et des Congrès”.

Ĉe la Grande Teatro Lumière, en la atendata prezento de la filmo okazis kelkaj prifajfoj kiam aperis ekrane la emblemo de Netflix – kiu decidis ne prezenti tiun filmon en la francaj kinejoj. Plendoj okazis ankaŭ pro teknikaj problemoj, kiu devigis la rekomencon de la projekciado.

Tamen je la fino de tiu prezentiĝo al gazetaro la recenzistoj aplaŭdis la rakonton pri amikeco de knabino kun nekutima besto, kiu estis genetike modifita kaj persekutata de transnacia firmao. La ĉefa mesaĝo rilatas al malzorgo de bestoj kaj metodoj de grandaj entreprenoj.


Ĉi tiu teksto estas adaptaĵo fare de Paulo Cesar Pires el portugallingva artikolo.

Nova katego estas taksata de Guinness-libro de rekordoj

katego

Kiam Omar estis katido en 2013, ĝia grando similis al tiuj de siaj gefratoj. Tiam ĝi estis alportita de , Stephy Hirst, al sia nova hejmo en la aŭstralia urbo Melbourne.

Tamen, post preskaŭ kvar jaroj tiu feliso de la raso Maine Coon estas 1,20 metroj longa, 14 kilogramoj peza, kaj povos esti la plej granda dombesta kato de la mondo.

Post reliefiĝo de tiu kato en interreto, reprezentantoj de Guinness-libro de rekordoj asertis al BBC en Londono, ke ili ricevis peton pri rekordo al Omar, kaj ili proponis al Hirst, oficialan mezuradon de la besto. La nuna registrita rekordo apartenas al samrasa kato, kiu estas 1,18 metroj longa, kaj vivas en la brita urbo Wakefield.

La rezulto pri la koncerna rekonproceso venos nur post monatoj, sed Hirst diris, ke famo ne gravas al ili.


Ĉi tiu teksto estas adaptaĵo fare de Paulo Cesar Pires el portugallingva artikolo.

Knabino liberiĝis de aligatora buŝo danke al indiko donita de temparko

aligatoro

2,5-metra aligatoro mordis 10-jaraĝan knabinon en lago de Florido (Usono), sed ŝi defendis sin per artifiko, kiu ŝi lernis en temparko kaj pro tio ŝi vundiĝis nur milde ĉe genuo kaj suro, laŭ informis ĉi-lunde diversaj lokaj amaskomunikiloj.

La knabino, kies identigo ne estis informita, estis lasanta siajn krurojn ĉe malprofunda parto de la lago de Parko Moss, apud la urbo Orlando, kiam la aligatoro atakis ŝin lastsabate, la 6-a de majo.

Laŭ la televidkanalo “WFTV” de Orlando, la knabino raportis, ke tuŝis la naztruojn de la aligatoro, ĉar tion ŝi lernis je ekskurso en la Parko Gatorland, kiu estas faka pri tia besto, kaj bonŝance ĝi malfermis sian buŝon.

Post ricevi 10 nodojn per kirurgia kudrado en hospitalo de Orlando la knabino resaniĝas hejme, kaj la aligatoro estis kaptita kaj mortigita. Fakte tiu okazintaĵo estis ja ia mirakla savo spertita de tiu infano.

En la usona subŝtado Florido vivas 1,3 milionoj da aligatoroj.


Ĉi tiu teksto estas adaptaĵo fare de Paulo Cesar Pires el portugallingva artikolo.