La "landlima ŝafhundo" plej multekosta en la mondo estis vendita kontraŭ 18,9 mil britaj pundoj

Iu “landlima ŝafhundo” (angle “border collie”) el la angla graflando Notumberlando iĝis la plej multekosta tia hundo en la mondo post ke ĝi estis vendita al usona farmisto kontraŭ 18,9 mil britaj pundoj.

Ĝi nomiĝas Megan, estas 2,5-jaraĝa hundino kaj la 21-an ĉi-monate ĝi estis vendita de Emma Gray, kadre de venda konkuro en la urbo Skipton, de la angla provinco North Yorkshire. De nun Megan ne plu prizorgos ŝafojn en la angla nordoriento, por tion fari pri bovoj de la raso Ŭagju en la usona subŝtato Oklahomo.

Gray estas 33-jaraĝa virino, kiu bredas kaj trejnas ŝafhundojn proksime al la urbo Morpeth. La mezuma prezo de hundoj lertaj je prizorgado de ŝafoj kaj bovoj estas ĉirkaŭ 2 mil britaj pundoj.

Mortoraporto: Chitetsu Watanabe kaj Katherine Johnson

Marde, la 25-an…
Chitetsu Watanabe, tiu 112-jaraĝa japano, kiu de malpli ol du semajnoj estis agnoskata de Guinness-libro de rekordoj kiel tia plej aĝa viro de la mondo. Li mortis hejme en la urbo Niigata, kiu ankaŭ estis lia naskiĝurbo. Laŭ li, kiu estis patro de kvin gefiloj, la sekreto de la vivo konsistas el “ne ĝeniĝi kaj ridetadi”.

Lunde, la 24-an…
Katherine Johnson, tiu 101-jaraĝa usonanino, kiu estis inter tiuj matematikistinoj de la usona kosmagentejo NASA spegulataj de la filmo “Hidden Figures”. Tia eksterordinara kapablo de Katherine pri matematiko helpis orbitigi la Apolon 11, tiun kosmoŝipon kiu unuafoje surlunigis homojn en 1969. Per tvitera afiŝo la NASA-administranto Jim Bridenstine asertis, ke Katherine “estis usona heroino, kies pionira postlasaĵo oni neniam forgesos”.

Usonano mortis sin ĵetante per hejma raketo

La televidkanalo Science Channel infomis, ke lastsabate (la 22-an) la 64-jaraĝa usonano nome “Mad” Mike Hughes mortis post malsukcesa pafiĝo de homloĝata raketo, kiu li mem konstruis siahejme en la usona subŝtato Kalifornio. Li raketis 1,5 km alten, tamen la paraŝuto por sekure alteriĝi fiaskis. Atestita de multaj homoj, sur sociaj retejoj peris bildoj pri tiu okazintaĵo en dezerta areo proksime de la loĝejo de Hughes, en Barstow, 180 km for de Los-Anĝeleso. Jen koncerna filmeto.

“Mad” Mike Hughes estis konata pro polemikaj asertoj kaj provi pruvi per sia homloĝata raketo, ke Tero estas plata. “Tiu provo delonge estis revo, kaj Science Channel estis tie por raporti la aferon”, tion asertis la televidkanalo, kiu estis registranta la eventon por nova serio nomata “Amatoraj Kosmovojaĝistoj”.

Germana karnavalo: Jen grandegaj pupoj alude al mondgvidantoj

Pupoj kun grandaj korpoj kaj kapoj spegulante la landajn gvidantojn de la mondo rolas, kadre de provoka parado, en tiu tradicia karnavalo okcidente de Germanlando. Ĉi-jare ĝi inkluzivas inter aliaj:

Tia venka brita ĉefministro Boris Johnson, kun ia ombra reĝino Elizabeto la 2-a malantaŭ li.

La rusa prezidanto Vladimir Putin, kun nuda torso, kontrolante per teleregilo iun tankon okupita de la turka prezidanto Recep Tayyip Erdogan.

Ia triumfa usona prezidanto Donald Trump, ludante poŝtelefonon aspektante liron (muzikilo).

La Karnavala Asocio de Majenco prezentis tiajn buntajn pupegojn lastmarde (la 18-an), kaj la tradicia parado okazos morgaŭ (lunde, la 24-an). Jen fotaro (kadre de portugallingva raporto).

La ĉefrolantoj de "Friends" registros specialan renkontiĝon

Rezulte de negocado komencinta la 11-an monaton pasintjare, la filmetservo HBO Max informis, ke la origina ĉefrolantaro de “Friends” efektivigos specialan renkontiĝon.

La filmo konsistos el ne scenara kunveno, ĝia titolo ankoraŭ ne estas difinita, kaj la registrado okazos ĉe la origina studio de la serio, nome tiu Stage 24, de Warner Bros. Laŭ la fakgazeto “Variety”, ĉiu el la ses roluloj perlaboros minimume po 2,5 milionojn da usonaj dolaroj.

Laŭ Vikipedio: “Friends (Amikoj) estas deksezona televida serio, situacia komedio en Usono. La serio prezentas ĉiutagan vivon de ses dudekjaruloj – pli poste tridekjaruloj; tri viroj kaj tri virinoj. La serion mendis la televida stacio NBC kaj pretigis Warner Bros. La unua epizodo aperis en la televida programo la 22-an de septembro 1994, la lasta la 6-an de majo 2004”.

Grego da 3 mil kameloj estis surstrate en la libia regurbo

Merkrede (la 19-an) noktomeze en la afrika lando Libio, 3 mil kameloj importitaj el Aŭstralio lasis la havenon de la regurbo Tripolo piedirante tra la stratoj kaj per aŭtovojo al la okicento trafis alian municipon (ĵaŭde la 20-an, 45 kilometroj for), laŭ raportis la novaĵagentejo Reuters.

La posedando de la bestaro decidis tion fari pro manko de kamionoj tie kaj por fuĝi el ebla pafado, kiel okazis lunde (la 18-an), fare de la subtenantoj de la komandanto Khalifa Haftar, kiu regas la orienton de Libio kaj de dek monatoj li strabas je konkero de la regurbo.

Oni manĝas kamelviandon en Libio, kiu kutime importas tiajn bestojn el Sudano. Koncerne al tiuj kameloj surstrate en Tripolo, iu komercisto klarigis al Reuters, ke sia amiko aĉetis ilin el Aŭstralio pro tre favoraj prezoj. Armita grupo ŝtelis 125 el ili dum ties trapaso en la ĉirkaŭurbo.

Mortis la elpensinto de tiu komando "kopii kaj alglui"

La usonano Larry Tesler, kiu elpensis tiun komandon “kopii kaj alglui” (Ctrl C + Ctrl V) mortis lastlunde (la 17-an) je la aĝo 74 jaroj, laŭ informis hieraŭ (la 19-an) la faka retejo pri teĥnikaro Gizmodo, kaj la blogo Apple Insider.

Diplomiĝinta pri komputadscienco ĉe la Stanford-Universitato de la usona subŝtato Kalifornio, la naskiĝejo de la usona teĥnikara industrio, Tesler dungiĝis en 1973 ĉe Xerox PARC (Palo Alto Research Center), kie kune kun Tim Mott, li kreis la tekstotraktilon Gypsy, kiu enhavis la esprimojn “eltondi”, “kopii” kaj “alglui” (angle “cut”, “copy” kaj “paste”), por redaktado de tekstoj.

Post Xerox PARC, li laboris en la firmaoj “Apple Computer”, “Amazon.com” kaj “Yahoo!”.