La fino de nekutima juĝafero – aŭtorrajto pri memfoto fare de simio

Post dujara nekutima juĝafero inter brita fotisto kaj indonezia simio, usona tribunalo de la urbo San-Francisko decidis ĉi-marde (la 12-an de septembro), ke la aŭtorrajto pri memfoto fare de la simio apartenas al la homa fotisto, kiu promesis kundividi la profiton.

Ĝis tiam la organizo pri defendado de bestorajtoj PETA (angla mallongigo de “People for the Ethical Treatment of Animals”) estis postulanta al tribunalo, ke la simio, nomata Naruto, “estus agnoskita kiel aŭtoro kaj proprulo de siaj propraj fotoj”.

La afero originis en la jaro 2011 ĉe la indonezia insulo Sulaveso. Tiam, pere de la fotilo de David Slater, iu “kresta nigra makako” (kiu estas simio de la speco “macaca nigra”) faris la plej faman memfoton de la historio.

David Slater kaj PETA anoncis lunde la jenan interkonsenton per kuna kominikaĵo: “Slater donacos 25% de la venontaj enspezoj el la “memfoto de la simio” al karitataj organizoj kiuj prizorgas la protektadon, bonstaton kaj medion de Naruto kaj la ceteraj ‘krestaj nigraj makakoj’ de Indonezio”.


Ĉi tiu teksto estas adaptaĵo fare de Paulo Cesar Pires el portugallingva artikolo.

Advertisements

Publikita de

Paulo Cesar Pires

https://esperanto.blog