Kuracistoj anstataŭigis polekson per halukso en aŭstraliano vundita

Antaŭ du semajnoj aŭstralia kamparano havis sian piedan dikfingron enmetita en la loko de sia mana dikfingro, kiu estis fortranĉita de virbovo. Tiu vundo okazis pasint-aprile al Zac Mitchell (20-jaraĝa), dum lia deĵorado ĉe bieno en fora regiono de Aŭstralio.

“La virbovo hufobatis mian manon, kiu trafis la barilon”, tiel klarigis Mitchell.

Kolegoj de la kamparano eĉ konservis la tranĉitan fingron ene de klimatizata kesto, sed post du vanaj provoj por enplanti ĝin, la kuracistoj decidis uzi la grandan piedfingron, per procedo kiu daŭris 8 horojn.

Komence Mitchell hezitis pri tiu opcio, kiu estis efektivigita en la hospitalo Sydney Eye. Sed ĝi praviĝas, laŭ la plastika kirurgo Sean Nicklin, ĉar “eĉ se oni havas kvar perfektajn fingrojn en la mano, la manko de io por formi “pinĉilo” nuligas treegan parton de ĝia laŭfunkcieco”.

Laŭ la kuracisto, tiurilate multaj homoj timas problemojn pri ekvilibro kaj marŝado, sed malofte ili okazas. Karen, la patrino de Mitchell, diris ke lia paŝado jam estas preskaŭ tute normala.


Ĉi tiu teksto estas adaptaĵo fare de Paulo Cesar Pires el portugallingva artikolo.

Advertisements

Publikita de

Paulo Cesar Pires

https://esperanto.blog